Барыс Гарэцкі: «Сярод беларусаў шмат тых, хто хоча абараняць Кіеў»

— Раніцай, калі з’явілася інфармацыя пра пачатак вайны і абстрэлы, многія людзі павыходзілі на вуліцу. Яны пілі каву-гарбату і чыталі навіны. Ніхто не пабег у бомбасховішча, — распавёў «Салідарнасці» Барыс Гарэцкі, наш калега, які зараз жыве ў Кіеве. — Быў невялікі адрэзак часу, калі гучалі сірэны, але гэта хутка скончылася. Панікі не было. Людзі чакаюць, што рабіць далей.

Паводле Барыса, на вуліцах Кіева шмат людзей з валізамі і заплечнікамі. Калега мяркуе, што людзі выязджаюць з горада альбо едуць у больш бяспечныя месцы.

— Транспарт працуе, ёсць чэргі на запраўках і вялізныя заторы на выездах з горада. Я сам не бачыў, але па тэлевізары паказваюць.

Сярод беларусаў шмат тых, хто хоча абараняць Кіеў. Раніцай, калі піў каву, чуў, як людзі казалі, што запісваюцца ў тэрытарыяльную абарону.

Учора я правёў апошні мірны вечар з сябрам-украінцам. Ён рэзервіст, удзельнічаў у АТО. Сёння ён сабраў рэчы і пайшоў у ваенкамат.

Барыс з жонкай і дзецьмі пайшлі паглядзець бомбасховішча, якое знаходзіцца ў школьным падвале, недалёка ад дома, дзе жыве сям’я.

— Вельмі прыкра, што нападзенне адбылося з беларускай тэрыторыі. Думаю, што ўкраінцы не здадуцца, армія будзе абараняць краіну, і людзі будуць дапамагаць.

Разважаючы пра пагрозы для беларускіх журналістаў ва Ўкраіне, Барыс Гарэцкі адзначыў:

— Калі мы хочам заставацца эфектыўнымі і працаваць у беларускай журналістыцы, трэба паклапаціцца пра ўласную бяспеку. Бо калі мы сядзім у бамбасховішчы, мы не можам быць эфектыўнымі.

З другога боку, сюды едзе вялізная колькасць журналістаў. Да многіх мах калег прыходзяць прапановы папрацаваць на еўрапейскае, сусветнае ці беларускае выданне, таму што ўсе хочуць тут цяпер мець карэспандэнта.